SUONNU E REALTÀ di Giardina Giovanni

( Tsunami 30-12-2002 - ) Stromboli 

Ddu juornu di manciari avìa finùtu,
ca subbitu mi visti appisuliàtu
un ticchiu i suli d'intra avìa trasùtu
m'avìa appena, appena, appinnicàtu.

Ma mancu passò vu giuru un quartu d'ura
ca mi sintìu chiamàri cu primùra,
'nta strata si sintianu li strigghi
e cacchi d'unu già fascìa sbrivigghi.

Sintìa un va' e vieni di sirena
ca si ci piensu, ancòra a testa mi sona.
iò subbitu pinsaiu all'uspitali,
"Madonna...cacchi d'unu stasci mali ! "

Ma quannu fora visti tuttu ddu 'mbruogghiu
e i piscaturi già fora tri migghia,
mi dissi: prima vaiu a uardàri a mari,
e poi decidu chiddu c'haiu a fari.

A corpu iò u mari 'un visti cchiù,
nun ebbi mancu u tiempu di uardàri,
ca na muntagna i mari vidìa arrivàri.
"Chistu nun è sciroccu , mancu gricàli,
è tiempu ca sta vota fasci mali ".

Scappàiu di cursa p'avvisàri a genti,
di 'nta marina curta o Portinenti.

Cchiù iddu, ora si purtàva avanti,
cchiù a mmia mi strincianu li denti,
mentri già l'onna si sbattìa 'nte scuogghi,
i varchi già rumpianu l'ormeggi.

Chi machini 'nte strati un parapigghia,
lu scopu era sarvàri la famigghia,

Ma pi furtuna tuttu avìa finùtu
pirchì du suonnu mia , m'avìa svigghiatu
ristàru 'nte strati sulu i curtigghia,
pi ddu scappàri cumu li cunigghia.

'Nta stu paisi nun si fá cchiù nenti
mancu si tu , cu tutta a vusci canti,
lottamu pi manciàri, du filúna,
mentri e tó spaddi iddi.......,
continuanu a futtirisi i miliuna !