L’amicizia oggi !  
di Giovanni Giardina   29-07-2012

L'amicu na vota era na cosa seria
pirchí tu truvavi puru 'nta miseria.
Si vua sapíri oggi chi nni pienzu,
prima mi fazzu a Crusci e poi accuminzu

Oggi 'un ci nn'é cchiú amici veri ,
su tutti tradituri , 'un sú sinceri ,
u miegghiu chi ha e c'ha sempri stimàtu,
a prima scusa ti porta unni l'avvocàtu

Na vota, si pi casu eri malàtu
l'amicu tu truvavi sempri o latu
quannu aví bisuognu era presenti
e in canciu,... 'un ti scircáva nenti,

Oggi si l'amicu u vidi avviscinàri,
è pirchì senti sciavuru i manciàri
giría, furría, 'un sapi c'avi a fari
pi ti putíri a fini poi scruccári.

Ma na vota si campàva di valòri !
unu s'ammazzava pi l'onòri!
Prifiría moriri poviru e onestu
ca campári tradituri e disonestu

Iò, quannu ancora travagghiava
nun c'era unu ca 'un mi scircáva.
tutti mi scircavanu cu l'amu
ora... 'un sannu cchiù cumu mi chiamu.

Chi brutti tiempi chi staiu viviennu!
Prima pi l'amicizia , poi pu Governu,
e 'un ci fasciti casu si sugnu già depressu,
pirchì ancora u miegghiu...veni appriessu !