di Peppino Mirabito

Li Murticeddi
Ci dissi a l'Armi Santi lu Signuri:
"Na vota all'annu putiti arriturnari
ma sulu di notti a li vostri casuzzi
p'attruvari li niputi e i parintuzzi.
Chiossà di chissu nun vi puzzu dari
ma proprio pirchì siti boni e cari.
Itici, ma però stativi accura
di fari ccu silenziu e ccu premura,
Cci dati na vasata di luntanu
o na carizza leggia ccu la manu."

"E nun ci hammu a purtari propriu nenti,
na cosa dunci a ddi poveri nuccenti?"
"E va beni, quarchi cosa nni lu trusciu,
Però m' arraccumannu...senza scrusciu!"
"E si quarcunu lu stessu s'arrusbiglia?"
"Peggiu ppi iddu, cci lassati caniglia!"
Ed è accussi ca chiddi Armuzzi Santi
cinninu sempri doppu l'Ognissanti
s'infilanu sutta porti e finistruna
quasi ca fussi lu lustru di la luna.

Cumu filinii sunnu fatti di nenti
e si talianu disiusi li parenti,
lassanu pupi, taralli e nuciddi
e marturana ppi li picciliddi,
ccu l' ucchi s'accarizzanu ogni agnuni
e restanu ccu li testi a pinnuluni.
La catananna voli taliari lu nicu
sinno' duppu ci arresta l' allammicu.
Poi, musci si nni vannu suspirannu.
P' arriturnari ... si nni parla n'antr'annu!
(di Anna Mosca Pilato)