S’avissi diciott’anni  

di Graziosa Casella

Recitata da Giovanni Giardina

S'avissi diciott'anni di Graziosa Casella

E' veru sì, s'avissi diciott'anni,

o puru vintott'anni, comu a tia,

non li patissi tanti disinganni,

né mi vinissi sta malincunìa.

Ragiuna, e vidi chi a tia stissu 'nganni;

chistu ca chiami amuri è fantasìa;

troppu d'amuri canuscìi l'affanni,

e sacciu siddu è prosa o è puisia.

Pirchì, dimmillu, si non mi vo' beni,

voi mettiri 'stu cori a la turtura

e ccu ssi labbra duci m'avvileni ?

Ah, si 'ssa vucca to non è sincera,

làssami stari pri la me svintura...

ca autunnu non s'accoppia a primavera.